El día 9 d’abril tol alumnáu del cursu de 3º ESO matriculáu en llingua asturiana asistió a una actividá organizada pola Oficina de Normalización Llingüística del Ayuntamientu de Gijón/Xixón dientro de les salíes programaes pol departamentu d’estraescolares nomada Alcuentros de la Mocedá cola llingua “Saca la llingua” 2026.
Esti añu desendolcóse nes instalaciones de la Universidá Llaboral durante tola mañana. Fueron dellles actividades repartíes en tres estayes distintes: taller, xuegos tradicionales y concursu final nel salón d’actos.
El taller impartíu poles moces de Pan Duru tuvo perinteresante porque tol alumnáu pudo deprender a facer galletes con restos de pan, chocolate, nuez y lleche. Fueron dos recetes percencielles pero mui resultones. Depués pasaron a la zona de xuegos tradicionales onde pudieron probar el tiru cuerda, la rana, el tiru al palu, los zancos y la llave. Finalmente aconceyamos tolos institutos nel salón d’actos pa participar nun concursu final d’entrugues relacionaes cola cultura asturiana, onde les moces Asturxules punxieron el so empeñu en que tol alumnáu llevara un bon sabor de boca na parte final. El nuestru alumnáu ganó’l concursu magar qu’empataron col IES Fernández Vallín: un broche d’oru pa una xornada perprestosa.
